اذبهلال صرصور

اسم البوست غريب اوى بس والله هو جه كده فى محاضره من محاضرات الكنترول اللى كلنا بنحبها صباح الخير يا جماعه :D:D

محدش يسالنى الساعه كام علشان اقول صباح الخير احنا حياتنا ماشيه زى الخفافيش احيانا بحس انى خفاش مش من بنى ادم اطلاقا :D

نرجع للكنترول .... ماده لذيذه جدااااااااااا وسهله وشيقه للغايه ... سامحنى يارب على الكدبه البشعه دى ... والدكتور قاعد فى امان اللى بيشرحلنا حاجه كده انا مش كنت سمعاها اساسا بس هو كان حاجه اكيد سهله .. واذ بيه فجاه جه فى بالى صرصور يعينى ارتكب جريمه بشعه على الصبح ادت بيه الى وجوده هائما على وجهه فى كليه الهندسه ومش فى اى مكان فيها لالالا فى قسم كمبيوتر ومش فى اى ماده دى ماده كنترول اكيد اكيد كان مزعل مامته قبل ما ينزل من البيت :D:D

طبعا انا ولا سامعه المحاضره ومركزه فى تخيل الصرصور بتاعى جه مذبهل من مناظرنا ناس نايمه واللى بيحاول يفهم واللى بيضحك ... اكيد انا :D:D

وعلى وشه نظره بؤس رهيبه بجد صعبنا عليه اوى وهو مش فاهم احنا مالنا بس مين عامل فينا كده حب يعرف..... دور وشه يشوف مين واقف قدامنا لقى حبيبنا واقف ..... وصوته مش باين خالص مع ان فى مايك اتجاب بس معلش بقى مش على اعلى تقنيه :D:D

ووقتها فهم الصرصور احساسنا وحب يعمل اى حاجه تساعدنا كان عمال يدير ما بينا وما بين الدكتور وكانه بيقول اعمل ايه اعمل ايه اعمل ايه طب انادى بتوع اتحاد الطلبه يغلسوا عليه اصله مش بيحب يبقى فى صوت :d

ولا اروح اقف قدامه يمكن يكون عنده حساسيه من الصراصير ولا ايه وكان فى علامات تعجب على وش الصرصور البرئ بيسال سؤال واحد بس قوليلى اعملكوا ايه .... بس واسفاه مفيش حاجه تتعمل لما حس بخيبه الامل ان مفيش حاجه تتعمل مالقاش حل غير انه يجى يقعد جنبى يونسنى فى سرحانى العميق ده والشخبطه اللى بشخبطها كالعاده وكل ده انا ولا فى الحاضر خالص وشويه وكنت انا والصرصور هنلعب شطرنج ولا حاجه :D:D

وفجاه فوقت على صوت ساره من اللى كنت فيه على ما جمعت احنا بقينا فين وليه وببص على صرصورى اختفى مشى ليه....ليه.....ليه يا ساره فوقتينى بس كنت خلاص هكسبه :P:P

بس مسيره يجى تانى مش هيهون عليه يسبنا لوحدنا بعد ما شاف اللى بيحصلنا ....ارجع اكمل اللى ورايا بقى مع وجيه :D:D

للى مش عارف وجيه ده اسم اللاب توب بتاعى اللى دايما مغلباه معايا :D:d