توهان .. !!

اصعب وقت .. لما تبقى مستنى الوقت يعدى وكل دقيقه تبص لساعتك ... تعد معاها الثوانى وكل ثانيه تمر بساعه ... تحاول تشغل نفسك بأى حاجه تانيه تضيع وقتك فيها ... تبص حواليك ... مكان مرتب جدا ... هدوء فظيع ... نادى باعلى صوت ... تسمع صدى صوتك بيتردد ... نفسك تقول اى حاجه قول ... قول كل اللى نفسك فيه ... كل كلمه هتقولها هتطلع منك للى حواليك بس للاسف محدش هيرد عليك ... مفيش اى حاجه قدامك غير مقابر وبس ... ارفع عينك فوق شويه ... السماء اخيرا صافيه قدامك , مفيش حاجه بينك وبينها مخلياك مش شايفها ... وجودك فى المكان ده يخلى عمرك يعدى قدام عنيك وتفكر فى حالك وحال كل اللى قدامك ... السباق اللى عمال تجرى فيه وتنقل من مرحله للتانيه ... ايه اللى مستاهل وايه اللى مش مستاهل ... تبدأ تراجع نفسك وتعيد حساباتك ... وتحط نفسك مكان اى واحد من اللى حواليك ... تفكر لو انت كنت مكانه كان الحال هيبقى عامل ازاى ؟!! رعشه تمر فى جسمك كله ... خوف ... دموعك تنزل من عنيك لمجرد بس انك حطيت نفسك مكانه وحطيت اهلك مكان اهله ... فما بالك بصاحب الموقف نفسه ؟!! دماغك عماله تجيب فى افكار غريبه ... حاجات حصلتلك ... خيالات محصلتش ... حاسس انك تايه فى عالم غريب ... مش عارف اذا كان حلم ولا حقيقه ... مش عارف اذا كنت نايم ولا صاحى ... تدق اخيرا ساعتك ان الوقت اللى انت مستنيه عدى ... ترجع تانى للعالم بتاعك ... تطلع من المكان ده سايب فيه كل اللى فكرت فيه ... تنسى كل حاجه وترجع تكمل حياتك ... وتجرى فى نفس السبق اللى وقفت عنده قبل ما تتوه فى العالم التانى !!